Kopzorgn week 51
Moi maoten en maotinnen,
Ofgeleupen maendag ston er in 't Olde Wieffien 'n stôkkien over de actie van 3FM Serious Request vanuut 't Glaezen 'Uus in Leiden. Dee actie zal jullie wel bekend weên. Maor now löt de verslaggever zich wat minder positief uut over de lokale omroep Steenwiek, want dee doen daor skienbaor neet an mit. De medewaarkers van Omroep Möppel em veur 't goeie doel wel 'n poosien in 'n soort glaezen 'uus deur'ebrocht, maor de lokale omroep Steenwiek ef 't allenig maor over de Top 105 op Olde-jaorsdag en dat is van 'n 'eel aander niveau, aldus d'Opregte. Wat vien'n jullie? 'Ad de SLOS eigelijk ook 'n soort van glaezen 'uus op de Maark moên 'em-n, om geld in te saemel-n veur 't goeie doel? Of 'em ze dat wel prebeerd, maor daor van de gemeente gien toestemming veur 'ekreeng? Miskien kan de wett'n'older daor wat dudelijk'eid over geêm'?
Snappen jullie ook, waoromme d'r gien geld is veur 't passend onderwies op de Voetelinkskole, terwijl er wel ruum zes miljoen euro beskikbaor is veur de verbouwing van De Meenthe en dreekwart miljoen om 't gemeent'uus duursaem te maeken? Of zol 'ier spraeke weên van " 't Emp is naoder as de rok"?
Ik mos 't eêm good lezen, maor 't ston er echt: B en W van Steenwiekerlaand gaon de gemeenteraod veurstel-n om de 'Istorische Verenige Iessel'am 'n eenmaolige subsidie te verlenen van zowat 21 duuzend euro! En dat bedrag is bestemd veur de ni'je locatie van de Verenige. Ik gun ze dat van 'arte, laot daor gien misverstaand over bestaon, maor toen de 'Istorische Verenige Steenwiek eur ni'je paand betrök, kon d'r van gemeentewege nog gien bloomegien of.
Wat denken jullie? Is de gemeente mit twee maoten an 't meten?
| < Vorige |
|---|
