Hei'j 't wel e'eurd

Skaesen.

Let op: opent in een nieuw venster

Ik kan mi-j 'elemaole neet meer erinner-n oe of ik skaesen eb 'eleerd. En van wee, weet ik eigelijk ook neet. Mien vaeder was neet zo sportief, dus dee zal 't neet ewest em-n. 't Enige sportieve wat ik van 'om wete, is dat i-j in zien jonge jaoren vootbalde bi-j Te Swallo. En ik ebbe mi-j as kiend ook nooit of'evrögen wat veur raere naeme dat was: Te Swallo. Pas jaoren laeter kwamp ik erachter (waorskienlijk deur 'n stôkkien in de kraante over dee vootbalclub van weleer), dat 't The Swallow was, De Zwaluw.

Ik kon in ieder geval skaesen. Mien 'ele kiendertied gebeurde dat op 'olties. Noren waren netuurlijk te duur; dee kree-j pas as oen vooten uut'egreuid waren. En dat duurde nog wel eêm'. Mit rubberleersen op 'olties mit oranje veters. Wi-j kon-n al 'eel snel skaesen op 'n stôkkien weilaand achter 't uus. As ik in mien, now ja mien, zeg maor onze slaopkaemer ston en mit mien naegels de bloomen van de ruuten krabde, dan keek ik op dat ondergeleupen stôkkien laand, lekker dichtebi-j.

Laeter was 'n groter stôk netuurlijk veul interessaanter en gong-n wi-j mit d'ele buurte naor 't Veentie. Teungwoordig gaon alle kiender onder begeleiding en meestal ook nog mit d'auto naor 't skaesvertier, maor toen was dat nog neet zo. Wi-j gong-n d-r gewoon op de fietse naor toe (eerlijk is eerlijk, ik woonde dichtebi-j 't Veentie, dus zo-n grote meuite was dat neet) en dan de skaesen onder. Wat 'n gepruts om mit oen kolde vingers de veters strak te krieg-n. En mit strak bedool ik netuurlijk ook strak, want skaesen moên strak zitten, mit as gevolg da-j al 'eel vlôgge steenkolde vooten adden.

Lees meer... Reactie toevoegen